Zara Zor Say Awaaz Dijiay....


Khalish Bhaiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiii


Zara Aaiay YahaN.... Kuch Poochna Hai

De di

Lakin Abhi Tak Aaey Nahi Khalish Bhai.....

Lagta Hai Bhabi Say Pooch Rahay HooN Gay K Unka Andaza Kiya Kehta Hai Kay Koun Sa Sawaal Poochaa Jaaey Gaa.

Yeh kaan meiN bhoNpo baja kar bulaana accha nahi hai, kamzoor dil tu pehle he laraz jaata hai.

Ab sawaal.nama bhi aaey ga ... lekin aap pehle meri aaj-beeti sun lijiay. Amoor.e.khaana daari ka aik aham masla dar.paish aa gaya tha, usse hull karne ki koshish meiN hooN.

Chootay baite ke qameez istiri karte hoay, begum per inkishaaf howa keh qameez ka daaman ghayyeb hai? School ki qameez thi, khair dosri nikaal ka baite ko pehnaaee aur school bhaij diya. Yeh daaman ka tukra kahaan gaya Shak seedha washing machine per gaya ... usske drum meiN tu nahi mila, ab pump ki talaashi zaroori ho gaee thi .. machine ko litaa kar pump khoola gaya, talaashi per ussi qameez se ghayeb shuda size ka kapta fan se lipta howa mila .. usse nikaal liya gaya ... lekin anaari party ke washing machine dobarah chala di ... pump khoolte hoay kuch paani aage peeche bhi ho gaya tha. Ab machine tu start ho gaee lekin drum ka ghoomna band ho gaya, yaani drum ki motor aaNkhaiN aur dhwaaN dekhaane lagi.

Shaam ko company se aadmi aaey, pump check kiya voh tu theek kaam kar raha tha, lekin baRay baite ke joote ka feeta bhi pump ke gird paaya gaya, jo hamaari nazroon se chook gaya tha.

Ab machine workshop meiN hai ... aur maiN ghar ke kapray manually dho raha hooN

Yaaani Kay Ghar Bhar K KapRay???
Khair Koyi Baat Nahi... Bhala AIk Din MeiN 4 LogooN Nay Kitnay KapRay Ganday Kar Liay HooN Gay... Lagay Rahiay Humaari DuaayeN Aur Naik TamanaayeN Aap Hi K Sath HaiN.

Lakin Iss Saaray Silsala MeiN Yeh Mat Bhool Jaaiay Gaa K YahaN Aap Ko Kis Liay Bulaya Giya Hai. Humara Asal Maqsad Yeh Hai K Sab Noujawan Aap Kay Tajurbaat.e.Khana.Dari Say Mustafeed HooN Aur Apnay Apnay Faraayez Ba Khair o Khoobi Sambhaal SakeN.

To Dil Thaamiay Aur Bataaiay K Pehla Sawal Sun'nay K Liay Tiyaar HaiN Ya Rooh e Afzaa Ka Aik Glass Haazir Kiya Jaaey Pehlay Dil E NatawaaN Kay Liay

Jab ookhli meiN aap logooN ne meraa sar dalwa he diya hai, tu mosal ki maar tu mujhe sehni pare gi.

Dour ke dhool suhaane sun kar phans gaya tha, jab haqeeqat ka inkishaaf howa tu buhot dair ho chuki thi .. aur waapsi ka raasta already band ho chuka tha.

Khalish Bhai Jo Huwa Ussay Aik Drawana Khwaab Samjh Kar Bhool jaaiaay Iss Umeed Par K Tabeer Achi Ho Gi...
Choonkay Aap KaRway GhoonT Ki Tarah Sabar Say Har Baat Pee Jatay Ho To Aap Ki Issi Sharafat Aur Patli Nazar Aati Gardan Nay Humara Housla BaRhayaa...

Jee To Pehla Sawal Ye Hai.....

Khaanay MeiN JhaT PaT Kiya Bana Letay HaiN?

Saadi Bhindiyaan, mixed vegitables, qeema paalak, paalak paneer, ...

waise sab se ziyaadah aasaan aik hafte puraana saalan, microwave meiN 2 minutes meiN bhaap dey jaata hai

ji

Sorry zara zor se baj gaya tha bhonpoo .. bas excitement ki waja se

Ap ki ap beeti parh kar bhi kaafi kuch SABAQ mila hoga noujawanon ko

Mera sawal yeh hai ke

Agar kabhi ghar ka kaam ap ke sar par jaye to kon sa kaam bari khushi khusi karletey hain aur kon sa kaam karney main aana kaani se kaam letey hain?

Khalish Bhai.....

Zara Beetay DinoN Ko Awaaz Dijiay Aur YaadoN Ki PaTaari Say Koyi Aisa Waqt Yaad Kijiay Jab Aap K Zimma Khana Banaana Ho... Bhabi Jee Araam Farmaa Rahi HooN.. Aap Chupkay Say Kamar Seedhi Karnay BeTh Gaey HooN. Aur Aik Damm Hi Bhabi Jee Ki Pukaar Sunaayi Day


Yeh DhowaaN Saa KahaN Say UThtaa Hai

Aap HaRhbaRha Kar Bhabi Ki Tarf Bhaagay HooN Gay Yaa Kitchen Ki Tarf??

Accha sawaal hai. Jawaab mulaahiza kijiay

MaiN amooman un amoor meiN dakhal nahi deyta jo begum saahiba ki jurisdiction meiN aate haiN, jaise khaana pakana, kapray dhoona, ghar ki saafaaee, waghara... lekin agar kisi wajah se yeh bhi karna pare tu mujhe koi aar mehsoos nahi hoti.

MaiN kisi kaam per aana kaani bhi nahi karta ... maiN tu kitchen meiN jaa kar begum se yeh bhi nahi poochta keh aaj kya puk raha hai.. sirf itna jaanta hooN jo kuch kar rahi haiN voh apne ghar ke liye kar rahi haiN accha he hoga.

In short, intihaaee farma.bardaar shohar hooN ... jisski beevi ko koi kaam karwaane ki zidd nahi karni parti balke voh khud zarooriyaat ka khayyal rakte hoay unhaiN poora karne ki saee meiN laga rehta hai.

Nahi, Alhamdo.lillah, kabhi yeh noobat nahi aaee. Balke agar ghar meiN 10/15 afraaz ki daavat ka ehtimaam ho raha hooN tu mujhe jab tak sab kuch khair khariyat se nimat na jaaey chain he nahi aata. Begum saahiba se ziyaadah alert maiN rehta hooN. Aur iss mooqay per voh meraa haath bataati haiN

mere bachpan meiN haamre ghar per subha waalid ke doostooN ki daavat thi, walidah ne qeemay ka esto banaya tha voh choolhay per tha aur unki aaNkh lag gaee ... mujhe raat ko uthaaya keh khaana dobarah pakaana hai, jali hoi pateeli meiN jo kuch hai voh bahar kooray per phaiNk aaou .. taake ghar meiN jalay ki boo na ho. MaiN pateeli ley kar ghar se bahar nikla aur chaar cheh makaan choor kar apne aik dost, jiss se sada dushmani chalti thi, ke ghar ke saamne usse khaali kar aaya. MaiN tu ghar aa kar soo gaya, subha hamaare ghar meiN jo shakhs sab se pehle darwaaze per aaya voh meraa dost he tha jo meri waalidah se kehne aaya tha keh "khaala, pata nahi Nazim hamaare ghar ke darwaaze per kya kala kala phaink aaya hai" ... usse tu walidah ne bhaij daya, lekin darwaaza band karne ke baad unki hansi nahi ruk rahi thi.

Uss Waqat Unn Ki Hansi Nahi Ruk Rahi Thi Aur Ab Aap Nay Mujhay Hansa Hansa K Behaal Kar Diya.....

Itfaaq Dekhiay k Abhi Jab Aap Ka Reply PaRh Rahi Thi... Saath Kitchen K Phairay B Lag Rahay Thay.... Itni Magan Huyi Post MeiN K Ab Kuch Kaala Kaala Mujhay Bhi Baahir Phinkwana PaR Raha Hai. Qeema Pulaao Bananay K Liay Piyaaz Rakh Kar Aayi Thi....Aur Wapis Kitchen MeiN jaana Bhool Gayi...


Agla Sawal Kuch Hi Dair MeiN.......

Agar sawal achha tha to jawab us se bhi achha hai

Achi baat hai ke jo kaam jis ke zimme ho to us ko poori tareeqey se karney dena chaiyye... Mashwara karna achi baat hai magar bila waja ki dhakhal andazi se khatoon-e-khana ko koft ho sakti hai

Thanks

Ab Next sawal sochti hoon

Wah Wah

Chaliay Seema Jee Aap Sochiay Agla Sawal Tab Tak Hum Khalish Bhai Say Aik Sawal Pooch LeiN Jo Kal Say Zehan MeiN Aa Raha Hai....


Jee To Khalish Bhai Aik ChoTa Sa Sawal



Kehtay HaiN K Mard (Shohar ) Kay Dil MeiN Utarnay Ka Raasta Uss Kay Maidhay Say Ho Kar Guzarta Hai...
To Kiya Yehi Baat MardooN Par Bhi Laago Aati Hai Agar Woh SughaRh HooN?

Khalish Bhai ki kher naheen ab to

Haey zod-o-pasheman ka pasheman hona

(Ager she'r misra ghalt ilkha ho to pls taseh ker dijiey ga)

Khalish Bhai Khana pakana asan hey ya Bhabhi ko manana ?

Aur Bhabhi ko mananey ke tareqy bataey jayen

Uss ghareeb ke paas tu 'aur bhi gham haiN zamaane meiN mohabbat ke siwa' waali misaal hamaisha laago rehti hai. Waise meraa zaati khayyal hai keh khaane peene ka shouq sirf shaadi se pehle rehta hai ... aur issi liye shohar apni beevi ke haath ke pakkay khaane ko maaN ke pakaaey aur khilaaey hoay per kabi fooqiyat aur tarjih nahi deyta. Woh iss liye keh her khaane ka taste usske system meiN already program ho jaata hai.

MaiN ba'az auqaat aap ki bhabi ke poochne per keh khaana kaisa pakka hai, aik baat kehta hooN, keh begum mujhe jo khaana tha voh tu meri maaN mujhe khila chukeiN, ab tu zinda rehne ka samaan karta hooN ... bacche maan ki tareef karte nahi thak.tay ... aur voh theek he karte haiN aakhir ko unki maaN tehri .. lekin mard jo ab shohar aur baab ka darja paa chuka hai ... iss baat se buhot khushi mehsoos karta hai keh usske bacche shouq se khaana kha rahe haiN. Aur yehi best appreciation hai aik acchi beevi ke liye.

Shughar shohar hone ki sourat meiN, beevi ko itminaan rehta hai keh usski kisi ghalati ko sanmbhaalne waala koi mojood hai aur kisi bhi emergency situation ko awaaz dey kar handle kiya jaa sakta hai.

Mulla ki douR masjid tak he rehti hai

Oh bhai, yehaan amoor.e.khaana.daari per baat cheet ho rahi hai .. aur aap out of course question pooch rahe haiN ... waise bhi mere tajarbe se aap ko koi faeeda nahi hoga ... waqt aane per sab thaat dhara reh jaata hai

Ap bhi seekh lain kuch Khalish bhai se Kaam aye ga MUSTAQBIL main

mein bhi ek sughar bachi hoon agar mujhe sab saleeqe sikha diye jaen

Khalish Bhai Aik Bahot Achi Baat Aap Nay Samjha Dee Kay Agar Shohar Bivi Kay Pakaaey Khaanay Ki Tareef Nahi Bhi Karta To Pareshani Ki Baat Nahi Hai.
Shukar Hai K Kamli Ko Yeh Paicheeda Baat Samjh Bhi Aa Gayi Warna Bartan Ab Aisay Sastay Bhi Nahi Aatay. Yeh Aik Imkaani Baat Ki Hai, Iss Par Ziyaada Ghour Karnay Ka Koyi Faayida Nahi.


Achaa To Shohar Kay SughaRh Honay Say Dohra Faayida....
Bivi Ghar Nahi Say Baahir Honay Ki Soorat MeiN Shohar Kay Khaanay Ki Fikar MeiN Dubli Na Ho.
Aur Emergency Situation MeiN ZARA AAIAY TO Keh Kar Har Fikar Say Azaad.

Khalissh Bhai

Aik Sawaal Aur....


Ghar Kay Ikhrajaat Sahi Tareeqay Say AurateN Chala Saakti HaiN Ya Mard?

Aap Ki Zaati Raaey Darkaar Hai.

Khalish Bhai according course to sab hi question poch leyn gey aap se koi to ho na out of syllebus Qs pochney wala

"ussey chutti na mili jis ne sabaq yad kya"

Khalish Bhai aap sughar shadi sey pehley bhi they ya shadi ke baad yeh change aaye ?

Itna sughar hon ke future meyn koi problem naheen hogi inshallah

Jee Jee zaroor Isi liye to yeh new section plus yeh topic start kiya hai ham ne ap batayen ap ko kiya seekhna hai ya Khalish bhai se kiya poochna hai

Jee Jee pata hai ap ke SUGHAR pan ka ..... Kahain to woh QISSA suna doon

helloo..poleyn kholne ki naheen ho rahi hey
werna baron baron ki poleyn khul jayen gi

wesey bhi ajkal emergency nafiz honey ki kahani chal rahi hey

Aap ko shayed mere jawaab per hairat ho. Mere nazdeek ghar ke akhrajaat ka zimme.daar aurat (beevi) ko bana uss per zulm karna hai. Koi raqm mahaana taur per usske haath meiN thama di jaaey keh iss se ghar chalaao aur voh be.chaari iss teen paanch meiN he kharach ho jaati hai.

MaiN yeh bhi nahi kehta keh ghar ke akhrajaat per koi control na ho. Mard hazraat apni kamaaee, aur bachat factor ko daikhte hoay isse acchi tarah organize kar sakte haiN. Demands bhi unhi ki ziyaadah hoti haiN ... maiN ne tu yehi daikha hai keh khaana pehle shohar aur bacchoN ke saamne rakh diya jaata hai aur ghar.waali sab se aakhir meiN khaati hai ... baccha kucha ... yaani agar bacche ne apni plate meiN kuch choor diya hai tu usse phaiNka nahi jaata, balke maaN samait leyti hai.

Maheenay ke shuru meiN miaN beevi shopping ke liye aik saath jaaeiN, sab se pehle kitchen meiN jo ashiya khatam ho rahi haiN unhaiN 're-fill' kiya jaaey. Sabzi tarkari daily basis per bhi khareedi jaa sakti hai aur weekly basis per bhi .. beevi sabzi bana kar fridge meiN rakh sakti hai aur aik hafte meiN mukhtalif sabziyaaN pakaaee jaa sakteiN haiN. Gosht aur Murghi bhi weekly basis per laaey jaa sakte haiN. Utilities ke bills, bachooN ki school fees waghara, jaise jaise wasool hooN unki payment kar di jaaey ..

Paise ki dealing mard ke haath meiN he rahe tu theek hai. LEKIN ... beevi ko as pocket money, (petty cash ... puraane waqtoon meiN pandan ka kharch) deyna bhi intihaaee zaroori hai ... yeh ba.qaidgi se ho aur shohar ko isska hisaab kitaab leyne ka haq na ho. ***

Iss pooray process meiN beevi ki aham zimme.daari yeh bhi hai keh voh ashya.e.zaroot ki kami ke baare meiN shohar ko zabaani na bataaey balke likh kar list bana ley taake waqt aane per yeh kami poori kar di jaaey.

Khush RahaiN

*** Aik zaroori baat yahaan kehni reh gaee thi, soocha add kardooN. Beevi ki iss pocket money meiN sirf ussi ke personal akhrajaat hooNge ya voh akhrajaat jinhaiN voh shohar se claim na kare. MehmaanoN ki aao.baghat ke liye agar kuch bazaar se mangwaya gaya hai aur iss fund meiN se paise istimaal hoay haiN tu voh shohar se claim kar liye jaaeiN. Aur agar ghar ke istimaal ke liye koi cheez iss fund meiN se aaee hai tu voh bhi claim karli jaaey.

Mujhe sughar banaane ka credit meri waalidah ko jaata hai, aap ki bhabi ko nahi. Lekin agar meri bhabi ko chala jaaey ... tu koi muzaaeqa nahi

Waise shayed zimme.daari ka ehsaas mujhe hamaisha se raha hai. Shadi se pehle bhi tha, aur baad meiN bhi hai. Lekin shadi ke baad yeh ehsaas qavi se qavi tar hota jaa raha hai.

Very nice ... Buhat achhi tarah explain kiya hai ap ne

Main ne yeh dono tareeqey observe kiye hain aur i think agar kharcha mard ke haath main ho to Kaafi sahoolat rehti hai khaaton-e-khana ko... Warna ghar ke kaam bhi aur phir ikhrajat ka hisab kitab

Aur sara kharcha aurat ke zimme hone main to pocket money ka koi zikar hi nahi hota.

Ok to phir apne ALFAZ wapis lain ap

Emergency

Khalish bhai mera yeh sawal hai ke

"Ghar ki decoration aur us ko maintain rakhney main mard aur aurat ka kiya role hota hai?"

IssmeiN mard ka hissa itna he hona chahiye keh apni jaib, aur ghar ki zarooriyaat ko daikh kar aurat ko mooqa dey keh voh apna ghar decorate kar sake. IssmeiN upper hand aurat ka he hona chahiye. Ussi ke shouq aur khawaahish ko paish.e.nazar rakha jaaey. Isske fori aur dair.pa fawaaid buhot saare haiN.

(1) Aurat ko apne 'hoone' ki ehmiyat ka ehsaas hona
(2) Aurat ko iss baat ka ehsaas hona keh usska shohar usska khayyal rakhta hai aur usski khushi ke liye buhot kuch kar sakta hai.
(3) Mard ko yeh itminaan keh usski beevi ghar meiN ziyaadah sukoon mehsoos kare gi.
(4) Iss decoration ki daikh bhaal aur safaaee suthraaee ka aurat khaas taur se khayyal rakhe gi keh yeh usske mian ki kamaaee hai.
(5) Ghar meiN agar bacche hooN tu unhaiN maaN se targheeb mile gi keh voh ghar ki cheezooN ko saaf suthra rakhaiN ... yaani unmaiN saleeqa.mandi ka rujhaan bachpan he se develop hone lage.
(6) BacchoN meiN maan baap ke efforts ki qadar paida ho.

Ab raha imkaani toot-phoot, ya cheezooN ka puraana hone ka sawaal, tu toot-phoot ki repair shohar ke zimme, voh khud repair kare ya phir kisi kaari.gar se karwaaey. Carpets, Beds, Sofa Sets, Tables, agar puraani ho jaaeiN tu unhaiN dispose off kar diya jaaey aur naee ley li jaaeiN. Lekin yahaan per mian beevi 'depreciation' ki clause ko madd.e.nazar rakhaiN. Keh aik cheez 10 saal istimaal hoi hai aur agar usske istimaal ki qeemat 1 Rs rooz lagaaee jaaey tu 3650 Rs to voh cheez already pay kar chuki hai.

Khush RahaiN

Khalish Bhai jab tak walden hayat they meyn bhi kafi sughar tha lakin jab sey job meyn aya hon aur specifically ISB meyn akela rehna pera hey to sara sugharapa ahista ahista khatam hota chala ja raha hey ..pata naheen kyun

Zimerdari ka ehsas to sab ko hi hota hey khas tor per jo gher meyn barey hon lakin chunkey meyn gher meyn sab se chota honey ki wajah se gher ki zimedaryan uthae naheen heyn shayed yeh wajah bhi ho sakti hey merey choom honey ki ...

Mughey ap se mukamil itefaq he ke shadi ke baad aap ki zimeydarayn berh jati heyn aur aap ka routine life style bhi change ho jata hey...

In end shadi ke baad sarey credit BV'yun ko hi jatey heyn bachun samait

konsey alfaz .mitti paao ..aap apne alfaz meyn byan kerdeyn woh alfaz

assalam o alaikum
bahot acchee post hai,awesome.

khalish bhai se ek sawal:
pehli dish kab banaayi,shauqiya banaayi ya zururatan.
ek aur sawal
shadi se pehle kya aap chaahte the ke aapki begum acchee cook hon ya aisa koi khayal naheen tha.

itni acche post. bahot garden garden hokar reply kiya,kahan gaya logon?

MaiN tu khair se apne waalidi ke beevi ke credit meiN he jaata hooN, aap bhi apne waalid ki beevi ke credit meiN jaate haiN

kissi maali e poch ker dekhen naa

Yeh Ehsaas Waali Khoobi Agar Har Mard MeiN Ho To Sab Kay Liay Ziyada Behtra Hai Yaa Iss Say Kuch Nuqsaan Bhi Hai Mard Ko?
Kionkay Aksar Log MardooN Kay SughaR Honay Waali Khoobi Par Nukta Cheeni Kartay HaiN, Khaas Tor Par Uss Waqt Jab Woh Bivi Ki Madad Kay Tor Par Ghar K Kisi Kaam MeiN Uss Ka Haath Bataaey.
Sab Ki Nahi Kuch LogooN Ki Baat Kar Rahi HooN.

Khalish Bhai maan gaey aap ke bain-as-sator perhne ki khudada salahyet ko bhi

yeh sab aap ke walden ki terbyet aur gher ke mahol per muhasir hota hey jo waqt ke sath sath mature aur ehsas-e-zimedari banta jata hey.

Behna

Aap ko dono posts 'invisible' ho gaeiN theiN, kaise? mujhe andaaza nahi, lekin maiN ne unhaiN visible kar diya hai.

Aap ke dono sawaal buhot umdah haiN ... aur aap ne mujhe buhot kuch yaad delaa diya hai.

(1) Pehli dish maiN ne mohalle ke larke aur larkiyouN ke saath mil kar banaaee thi jab meri umr 8/9 saal rahi hogi. Ghar ke peeche jo gali thi ussmeiN 'choolahay ka saag' buhot wafar miqdaar meiN tha, kabhi kabhi voh toor kar ghar ley aata tha aur waalidah se pakwata tha. Aik din hum bacchoN ne plan kiya keh hum khud pakaaeiNge aur phir sab ke gharooN se kuch na kuch aa gaya aur hum ne gali meiN he haandi charha di ... eentooN ko cholha, lakriyouN ki khabacchiyaaN (99.9 % HC waalooN ki samajh meiN yeh lufz nahi aaey ga .. lekin aap samajh gaee hooNgi) saag, ghee, mirch masala, sah he kuch yehaiN pohanch gaya tha.

(2) Iss qadar zaati baat pooch li aap ne Jab aap ki bhabi apne maike se widaah ho rahi theiN tu meri khush.daman (yeh lufz bhi sar per se guzre ga logooN ki) ne mujh se kaha keh baita yeh college se seedhi tumhaare ghar jaa rahi hai .. tum kyoN ke bahar rehte ho, lihaaza maiN ne inki rukhsati meiN koi hujjat nahi ki, lekin agar tum Pakistan meiN rehte tu maiN shaadi kam az kam aik saal aur multavi rakhti inhaiN kuch sekhaane ke liye ... aur umeed zahir ki keh maiN sab kuch sanmbhaal looNga ... unka mujh per bharoosa kaam aaya ... aur maiN ne aap ki bhabi ke pakaane ki hamaisha qadar ki .. keh mere saath voh bhi tu khaaeiNgi ... ab tu mashaa.allah buhot khoob pakaati haiN. Waise bhi maiN aadatan chatoora nahi hooN, jo mil jaaey wohi kha kar paida karne waale ka shukar baja laata hooN. MaiN shaadi se pehle bhi aisa he tha jaisa ab hooN...

Khalish Bhai Aap Nay Iss Tarah Khoobi Say Uss Waqt Ki Manzar Kashi Ki Hai Kay YooN Lag Raha Hai Kay Aap Kay Mohallay MeiN Hi 2 Ghar ChoRh Kar Humara Bhi Ghar Tha
khabacchiyaaN .. Qaba Type Ki Cheez To Nahi...ChoTi Achkan Jaisi?

Agar Nahi To Bata Dijiay Kionkay Agli Baar Humara Shumaar 99.9% MeiN Na Ho.


Aap Nay Jis Tarah Say Bhabi Ka Sath Diya Aur Unki Housla Afzayi Ki Uss K Liay Issi Ko Poora GulistaaN Samjhiay Ga.

Ab Aik Aur Sawal..... (Issay Zaati Hawalay Say Nahi Poocha)


Agar LaRki Nay Rukhsat Ho Kar Akelay Ghar Jana Hai JahaN Saas / Nand Sath Nahi HaiN Tab To Aisa Chal Janay Ka Imkaan Hota Hai Lakin Aik Bharay Ghar MeiN Janay Wali LaRKi Kiya Mukhtalif Soorat e Haal Ka Shikaar Nahi Ho Gi?

QUOTE

Kionkay Aksar Log MardooN Kay SughaR Honay Waali Khoobi Par Nukta Cheeni Kartay HaiN, Khaas Tor Par Uss Waqt Jab Woh Bivi Ki Madad Kay Tor Par Ghar K Kisi Kaam MeiN Uss Ka Haath Bataaey.

Aap ki iss baat se meri aaNkhooN meiN aaNsoo aa gaey haiN. Hamara pehla baccha buhot choota tha, usse ley kar hum Pakistan gaey. Baaz dafa aisa howa keh baccha raat bhook ki wajah se rooya, aur aap ki bhabi soo rahi theiN tu maiN khud uth kar bacche ka doodh bana laata tha. Jab bacche ka pamper churwaane ka waqt tha tu hum usse her aadh ghante ya aik ghante ke baad bathroom ley jaate the.

Bacche ke liye doodh banaate aur usse bathroom ley jaate hoay meri waalidah ne mujhe aik aadh martaba daikha ... aik din mujh se kehne lageiN keh baita maiN ne tumhaiN apne bacche ke liye yeh kaam karte daikha hai ... ab mujh se direct sawaal kiya keh "tum ne apne baap ko bhi kabhi aisa karte daikha hai" .. maiN ne kaha keh yeh meri beevi aur meraa baccha hai maiN inka khayyal nahi rakhooNga tu aur kon rakhe ga ... kehne lageiN keh baita tum theek keh rahe ho lekin meraa sawaal apni jaggah hai "tum ne apne baap ko bhi kabhi aisa karte daikha hai" ... yeh voh cheekh aur ehtijaaj tha jo maiN unki baat meiN pehle mehsoos nahi kar saka tha ... Allah unki maghfirat farmaaey aur karwat karwat jannat naseeb kare (Aameen).

Mukhtasir Yeh Kay Itraaz Ki Gunjaayesh Nikal Hi Aati Hai.

KahiN Yeh Bhi Aik Waja To Nahi K LaRkiyaaN Amooman Joint Family System Pasand Nahi KarteeN?

Hai Na Baat Sochnay Ki

bahot accha laga aapka reply parhke ,balke itne shauq se padha ke bass woh bhi kya zamana raha hoga aur palak jhapakte beet bhi gaya.
handguliyaa to hamne bhi bahto pakaayi hai saheliyon ke saath,chhoti chhti terhi meedhhi rotiyaan aur kacchi pakki aaloo sabzi ,aur phir sab mil kar khaate the itn lutf ata hai ke duniya ki behtareen dawatein is par qurbaan.

2. ladkiyon ko cooking aaye ispar maan baap itna zor naheen dete,mujhhe lagta hai ke basics ana chahiye aur acchee cooking aatih o to kya kehna.
waise to be honest mujhhe bhi kucch naheeh sikhaya gaya,pyaar dulaar abhi parh rahi hai,etc etc
aapne bhabi ko smooth transition mein help kee,parhkar bahto accha laga,kam hi log itne understanding hote hain.bhabi acchee cook ban chuki hain,great to hear that.
sorry agar yeh sawal bahot zaati laga aapko,main bhi zara sambhal sambhal akr poocch rahi thee ke poocchna chahiye ya naheen.maagr itminaan rakhiye,bhabi ko dekha nahene mile naheen lekin unkibahot izzat hai dil mein,aap dono bahot respectable hain hamare liye isliye sawal akrte mein hichkichaahat thee.
khush rahiye aur hc ko aabaad rakhiye