Aaj besakhta khayal aaya keh jeena chor daitey hain. Hum ne umer ke kitney hi utar charhao dekh liye. Ghum~o~Khushi ke kitney hi mausam miley aur bicher gaye. Ab jo bhi ho ga woh iss mausam sey behter nahin ho ga. Ab koi khushi iss josh o jazbey sey dil ki dehleez ko par nahin karey gi aur koi bhi ghum itna na~mukhtatum nahin ho ga. Ab jo pal bhi guzrey ga wo kisi aur pal ki yaad mein guzrey ga. Dil ne kaha ke phir kya faida iss aazgasht mein jeeney ka. Abhi jab sab kuch yak baar mehsoos kar liya to in mohabbatoun ke darmian koi shairana sa ikhtataam dhoondh laitey hain. shayad humain zindagi sans laitey rehne ke bawajood us tarha yaad na kar sakey, jaisey eik lajawab jawaan maut ke baad yaad rakkhey gi. Hazaron apney parai, jab bhi kisi anokhi baat ka zikr karein gey to humari jaisi khoobtar zindagi aur pur'asraar maut ka tazkira chal nikley ga. Aur hum aasmanon pe kaheen iss aakhri nazam ki lazzat liye apne kadar danon ko dekh kar mehzooz hon gey.



Abhi yeh soch mukammal bhi nahin hui thi keh zehn mein khayal aaney laga keh log maut sey dartey kyun hain? Ager zindagi ka ikhtataam hatmi hadd hai, to kya anokha sakoon hai keh jis ko kabhi bekarari nahin milley gi. Aur ager kabar ke kisi goshey sey koi khuda nikal aaya, to khoob mehfil sajjey gi. Tasveer ka woh rukh jo hum ne faqt socha, hum dil ki aankh sey dekhain gey. ager sawal jawab bar~haq hai, to kitney sawalon ke jawab humain bhi poochney hain Khaalik sey. To phir maut ko to waqayee momin ki meraj aur muhafiz hona chahiyey. Humain to bekarari sey intezaar hona chahiye waqt e visaal ka. Kab apne Khuda sey milain gey aur woh sab kuch keh payain gey, jo tanha raaton ke sajdon mein Jah~e~Namaz par aansooun sey kehtey aaye hain.

Ab jee iss fikr mein gum hai ke jaaney ka kya samaan karein. Zehn ka koi hissa malamat karta hai keh hum maut ka faisla khud nahin kar saktey, mager humain shouk~e~Visaal mein yeh hosh kahan keh kabhi Jannat o Jahannum ka sawaal bhi utthay ga. Humara mehrbaan Khuda, humarey ishq ka mumba o markaz, iss shauk e deedaar ko gunah kaisey samajh sakta hai. Aur hum malangon, darwaishon ka iss jahan~e~rang~o~bo mein kya kaam? Chalo accha hua keh aaj iss shiddat sey khayal~e~safar aa hi gaya keh hum samaan~e~aakhir karne lagey. Maloom hua keh humain kuch bhi darkaar nahin. Yahan kuch aisa nahin jis ki humain yahan khwahish ho, to phir wahan in cheezon ka kya kaam. Hamain to libas ki bhi fikr nahin, ke koi mehrbaan humarey aakhri pairaahan ka bandobast az rah~e~karam ya Fi~AmaanAllah kar hii dai ga. Besakhta muskuraney lagey keh sufaid rang hum pe jachta bhi barra hai. Khair, apne Aaqaa~o~Maula ke ru baru kis kafir ko khayal aaye ga zaibaish ka. Lekin yeh humari bashriyat hai ke chahtey hain ke uske samney behtereen andaz mein jayein.



Sochtey hain keh kon sa tareeka sada o aasaan rahey ga. Aakhir humain apney pyaron pe bhi kuch reham karna hai keh jab woh humarey Jisd~e~Khaki ko dekhain to unhain sadma na ho. Mager tareeka itna dushwaar bhi nahin hona chahiyey keh hum beech rastey apna irada badal lein, ya phir woh asoodgi jis ki taraf jaaney ki tamanna hai woh darmian mein mehav ho jaaye. Abhi ilm~e~abdaan ke paich~o~khum soch rahey thai keh khayal aaya, keh dushwaar maut nahin, jeena hai.

Imtehaan~e~bashar zeest mein pinhaan hai, wagerna qaid~e~hayat sey azadi har chand sehal hai. Hum to uss noor ki taraf chaley jain gey jis ki lao humin pukarti hai, mager un logon ka kya ho ga jo humarey peechay reh jain gey. Unke Roz~o~Shab kis qayamat mein guzrain gey. Unki wahshaton ka koi sathi na ho ga. Apne lehed pe baith kar aansoo bahaney walon ko pursa kaisey dain gey hum. kaisey kahein gey keh hosla karo kyunke hum khush hain. Hum apne jaan lai kar unki zindagi ka eik hissa bhi cheen lain gey unsey. unke muskurahaton mein aansoun aur dard ki milawat na unhain jeeney dai gi aur na marne dai gi. phir dil nikla sadaa ka insaan dost aur mehrbaan. Apne asoodgi ka rasta dekh kar bhi jeeney ki batein karne laga. Besakhta hath ki lakeeron par nazar gaye aur hum ne eik sard aah bharri. Arrey yahan to saal ha saal ki tehreer maujood hai. Humain to itna sa safar bohot lagta hai. Ager khuda sey hi azadi mang lon to kya woh bhi burra hai? Humain koi lambi umer ki dua na dai, hum to jaaney ke liye tayyar baithey hain, aur bulawa nahin aata. Anb kis ko kahon ke yun gum sum si kyun baithi hun. Itne dinon baad aaj besakhta khayal aaya tha keh jeena chor daitey hain, aur humain zeest azad nahin karti!

Wah Usman, I'm speecless Itna zabardast likha hai k sochne par majboor kar de...
Yeh ap ne khod likha hai? :O
Zabardast & Awesum.... Hvae no words to tell U k kitna acha likha...

Tere Azaad Bandon Ki Na Yeh Dunia Na Woh Dunia
Yahan Marne Ki Pabandi, Wohan Jeene ki Pabandi...

pasand karnay ka shukyaa Mansoor... nai bhai khud nahi likhta... just kuch din pehlay parha tu socha doostuun sy bhi share kiyaa jayey.....

Bohat hi khoobsurat sharing hai... Keep sharing Khush rehye

Buhat impressive tehreer hai

Thanks for sharing

wah kaya baat hai bohat ghrai hai ap ki iss tehree may parh k ik pal k lain dil dehal sa jata hai ,k waqai jeena chore he dain kyun jab malik nay insaan ka buet banaya or or uss may rugh phooki tu wo bejaan buet jaan dar howa tu uss say kaha tu rab uss say hamkalam howa or kaha k tujhay may dunia may bajh raha hoon apna naib bana k wahan ja meray ahkam ki pabandi kar ,tu insaan ki rugh bara roi tarpi k wo ye judai sah na paye gi magar khuda k samnay uss ki kaya haseeyat jo hukam mila pura kiya or apnay malik-e-haqeeqi say juda ho ka dunia may agai ,yahan a k wo wadha bhool gai jo rab say kiya tha or dunia k rishtoon or wadonn may gum ho gai jo uss k lain paoon ki beriyan ban gey .abb jab kabhi kabhi wo rugh ko wo judai k waqat ka wada yad atta hai tu beqarari k alam may wo jeena chornay k souchti hai ,ap ne kaya aaksi ki hai uss dunia ki majboori ki uss beri ki jo uss ko azadi denay k lain kabhi tayar nahi hoti .hamesha uss judai k waqat k waday pe dunia ka wada ghalib ajata hai .or phir wo he hota hai jo ap ne beyan kiya hai .

aje ap ki iss tehreer nay mujh jasay dunia parast banaday ko phir say mera wada yaad karwa diya hai bohat shukriya asay acha topic share karnay pe ap mubarak baad k haqdar hai koi tu asa hai jo yaad di lata hai .

Itne dinon baad aaj besakhta khayal aaya tha keh jeena chor daitey hain, aur humain zeest azad nahin karti!

bohat khoob...really its awsome

buhut khoobsorat tehreer

thanks for sharing

manpaki!


bahoot khoobsoorat tehreer hay maut aur zeest ka paich o kham.

in kafiiyat se toh hur koi har pal guzarta hay, apnay he swaloN ka jawab dena kabhi kabhi bahoot mushkil hota hay...isi maut aur zeest ki laraye mey bhi waqt guzar jata hay.....

thanks for sharing.

bhout khoob very nice sharing...its so true close to reality so deep