Asalamoalikum,
jee to bihari kabab ki recipe bata rahi hoon main jo sab say different hai aur khanay main bay-had mazedaar!!

yahan main sirf 1 kg ka hisab bata rahi hoon agar ziyada banana ho to issi kay hisaab say ingredients manage kar lain.



Ingredients:

meat =1 kg(piece ko bikul saaf karwaiin aur us kay pasanday banwa lain agar zara bhi ghost main charbi hogi to woh galay ga nahi)
onion =3 big(piyaaz ko bilkul bareek piece kar bilkul bareek chalni like aatay wali chalni main daal kar uss ka saara pani nikal lain)
kacha papaya = 1 tsp full(pissa hua)
adrak = 2inch ka piece (pissa hua)
cooking oil = 6 serving spoon full
salt = hasb-e-zaiqa
laal mirch = hasb-e-zaiqa
kaali mirch = hasb-e-zaiqa
pissa hua garam masalah = 1tsp full

Recipe:

sab say pehlay gosht main salt aur adrak achi tarha say laga kar us ko khoob haath say mix (mul lain) yahan tak kay gosht bilkul chikna ho jaiy
phir us main baqi masalay papeetay kay illawa mila dain yani piyaaz,kaali mirch,garam masalah,laal mirch aur oil(oil agar karwa ho means surson ka ho to ziyada acha waisay aam cooking oil bhi theek hai) ko achi tarha laga lain
papeeta grill karnay say 7 ya 8 hrs pehlay lagain warna gosht bohat ziyada gal jaiy ga
yeh gost tayyar ho gaya gosht main masalah grill karnay say itna pehlay lagain like agar saturday night ko grill karna hai to saara masalah friday night ko laga dain aur papeeta sat morning main lagain

aab next marhalah hai iss ko grill karnay ka koilon par dheemi anch par grill karna hai
iss ko seekh par laganay ka bhi aik tareeqa hai jo main yahan nahi bata sakti laikin yeh bata doon kay isss ko seekh par ghuma ghuma kar lagaty hain aur bilkul tight rakhtay hain

to janab iss ko laal laal saink lain aur garam garam parathay aur shafaq sis ki bataii hoi dhanyay podinay ki chatni ya dahi podinay ki chatni aur salaad kay saath tanawal farmain.

BK par aik lateefah yaad agaya .... aik maratabha hamaiN aik behari family ki taraf say dawat mili k outing par chalaiN hum wahaaN bihari kabab banayengay. hum saath chal diyeh. kabab khanay k dauran maizbaan nay aik mehman say poocha: kabab kaisay thay .... onhouN nay soch samajh kar jawab dia .... g haaN bihari kabab say qareeb tareen shai theee... baRa maza aaya...... mezbaan ko yeh jawaab kuch pasand nah aayaa to woh hamari taraf moRkar bolay.... aap batayaiN kia yeh bihari kabab nah thay......... maiN nay kaha sir! bihari kabab oss kabab ko nahee kahtay jissay koi bihari tayyar karay ... balkay yeh aik dish ka naam hai........... woh mazeed khafa hogaye pata naheeN kiyouN.

pahli martabah bihari kabab bananay walouN say iltimaas hai k pahlay woh kissi achchee jagah ki banee howee bihari kabab ki dish ko taste karaiN. phir BK banananeki koshish karain. kaheeN onhaiN bhi above situation ka saamna nah karna paRay.

insharah
bawarchi khaane mein aane ka shukriya.
inshaAllah try karoongi recipe.
aur bhi share kijiye ga

waisay aap bilkul sahi kah rahay hain kay jab tak bilkul real walaa bihari kabab na khaya jaiy bihari kabab kay asal mazay say aashnaii nahi ho sakti
laikin meri recipe bilkul real wali hai chahain to try kar kay dekh lain

main nay jab bhi kisi ko bk khilaya us nay recipe zaroor poochi main nay ammi say poocha kay aur log bhi to seekh par kabab banatay hain to akhir woh kiya banatay hain??to ammi nay kaha kay woh log boti kabab ya seekh kabab banaty hain .............yani bihari kabab kabhi khaya hi nahi to akhir unhon nay khaya kiya hai kuun kay iss ka maza har kabab say bilkul diff hota hai.
aur yeh baat bhi fact hai kay bihari kabab ki asal recipe sirf bihari hi jantay hain warna to magzines main to bohat recipe aati hai bk ki laikin un main zaroor koi kami ya ziyadti hoti hai.




asalamoalaikum,
zaroor try keejiyay ga aur phir mujhay bataiyay ga kay kaisa bana
aur agar koi problem ho to most welcome mujh say pooch leejiyay ga.

takecare
wassalam

many many thanks insharah
ek baat aur
aap roman urdu bahot sahi likhti hain

assalamoalaikum,
thanxxx shafaq
urdu zabaan mujhay bohat piyari hai,agar koi urdu ko bigar kar ya qaaf ko kaaf bolta hai to mujhay bohat takleef hoti hai.
afsos ki baat yeh hai kay urdu ko bigarnay main ziyada haath un hi logon ka hai jin ki quami aur madiri zabaan hi urdu hai.

dua'oon main yaad rakhiyay ga
take care,
wassalam.

aapke khayaalaat jaankar waqai bahot khushi hui hai.
ham hi hain jo urdu ko khatm kar rahe hain.

mujhe toh siray se khana banana hi bhool gaya hai itni masroof life guzar rahi hai

kissi din khana khana na bhool jaiyyay ga sahera