zimedaar kaun?
~~~~~~~~~~~~~
31 dec. 2005 kee shab raath ke baarah baje dhobhi Muhammad Hussain apne baRe kunbhe ke saath so raha thaa. dhobii ghaaT kee is puraanii building meN teen kamrooN ka us ka flat jo paaNchveeN manzil par hai shadeed sardee kee lapeT meN hai. voh Khud tu pichle 3 maah se ek accedent kee vajah se apne kamre kee bistar par zer-e-ilaaj hai. doctors ne chalne phirne se saKhtee ke saath mana'a kiyaa hai. uskaa zeh'n ghar aur ilaaj ke baRhte hoove iKhraajaat meN uljha hoovaa hai keh saaree bachat inhee chakkarooN meN Khatm hotee jaa rahii hai.
uskee biwi ne daikhaa keh bachche jo balcony ke qareebii kamrooN meN so rahe heN kaheeN sardee kee shiddat se beemaar nah paRh jaaheN unheN jagah kar apne kamre meN bulaa laitee hai. jo nisbat ander kee taraf aur deegar kamrooN kee nisbat kuch garm hai.
aaj hee subha uskee biwi apnee ek jaanne waalee se das hazaar rupe udhaar le kar aayii thee ke doctors ne Muhammad Hussain ke ghuTne kee ek aur surgery karvaane ka kahaa hai. ooper se choTe bachooN ke school kee fees bhi bharnee thee.
uskee bivii ne lakRee kee almaarii meN se eid ke liye bachooN ke kapRe bhi nikaale the jin meN se kuch par silayii kaa kaam bhi baaqii thaa.
balcony se munsalik kamre meN jab uske liye baiTna muHaal ho gaya tu voh sab cheezeN vaheN bikher kar sone chal dee.
dhoobii ghaaT kee ghalee meN meHelle ke laRke aatish bhaazi ka saamaan liye 12 baje ke intizaar meN tayyar khaRe heN.
aur 12 bajte hee charooN taraf se paThaKhooN aur firing kee awaaz gooNjne lagee.
poorii galii meN jashn ka samaa thaa.
kuch log apne flat aur gharooN se bahar jhaaNk rahe the.
youN lag raha thaa keh sab kee zindagiyoN meN naye saal kee Khushii doR rahii ho.
najaane kaise ek murdaa saa paThaKhaa moHammad Hussain kee balcony se munsalik kamre ke andar jaa girah.
galii ke laRke jo paThaKhe phoR rahe the zara sehm se gaye lekn kaafi dair tak koyii aawaaz nah aane kee Soorat meN sab ne sukoon kaa saaNs liyaa keh chalo voh tu faaltoo paThaKhaa thaa bohat se deegar paThaKhooN kee taraH jis meN masaalah naheeN lagaa hovaa thaa.
sab laRke dobarah se apnee mastiyoN meN lag gaye.
saaree raat yeh silsilah jaaree rahaa aur youN galii meN hee laRkooN ko subaH ke paaNch baj gaye.
ab jab sab laRke tak kar ghar kee rah laine lage the keh aise meN achanak ek laRkee kee nazar dhoobii Muhammad Hussain ke flat se uThte hoove dhoheN pe paRee. voh choNk saa gaya aur apne saatyoN ko us jaanib mutavajjah karne lagaa.
sab laRkooN ke ausaan Khataa ho gaye unheN andazaah ho gaya thaa keh is aag kee vajah kaheeN nah kaheeN unke ek be-zarar paThaKhe kee maujoodgii hee thee.
voh bhaage bhaage dhoobii ghaaT se munsalik masjid maiN maujood soye logoN ko baland aawaz se itlaaH daine lage keh voh madad ke iye aaheN.
jab tak keh log aag bhujaane meN kaamyaab hoove tab tak moHammad Husain ke kamre meN maujood tamaam naye kapRe, lakRee kee almaaree aur voh das hazaar jo uskee bivi aaj hee udhaar le kar aayii thee sab jal kar raakh~ ho chuke the.