Mujhe Sultan Mehmood Ghaznavi ke mutallik kuch maloomaat chaahiye:

1- Mehmood Ghaznavi ne Hindustan par kyun hamla kiya ?? kya wajoohaat thi ??

2- Muslims ko doosray mazahib ki ibadat gaahon ko tabah kerne se mana kiya gaya hai to Mehmood Ghaznavi ne somanaat ka mandir kyun tora??

3- Kya wajah hai ke hindoun ke mandir ko tornay par hum bouhat musarrat ka izhaar kertay hain aur issay apni taareekh ka aham kaarnama batatay hain lekin Babari Masjid kay tootnay par ehtajaaj kertay hain ??

I just want to clear things, jin logon ne maloomaat share kerni hain sirf wohi reply karein.

Mehmood Ghaznavi nay Hindustan per hamla nahi kya! uss nay tu eak jari jang maiN hindu'ooN ko faisla.kun shikast day ker khatam kya.

Hindustan say jangooN ka silsila Sultan Mehmood kay walid Sultan Subaktageen kay ahad maiN hi shoroo ho gaya tha. Ju baat Sultan Mehmood nay Mehsoos key kay har jang maiN shikast khanay kay ba'wajood hindi fojooN kay tadaad agli jang maiN zyada hoti hay.

yeh eak aisa masla tha jis say koy aam insaan bhi ankhain nahi chura sakta tha. Sultan Mehmood ka shumaar tu phir duniya kay chand manay howay generals maiN hota hay. Offence is Best Defence kay asool per kaam kertay howay Sultan Mehmood nay Hindustan per 17 Hamlay kiya ( 16th was on Somnaat) aur hindu'ooN key taqat ko para para ker kay rakh diya.


Sultan Mehmood nay Sirf Somnaat ka mandir hi nahi toRa, Mithra ( Kirshan key jay'e Paidaish) aur Thansir kay azeem mandir aur but bhi toR diya.

YahaaN per yeh batata chalooN kay Hazrat Ibrahim (AS) but kyoN toRay. kya App (AS) ka maqsad yeh nahi tha kay apni qom per wazah ker sakaiN kay yeh bay.jan moortiyaaN ju apni hifazat nahi ker sakteeN woh kisi aur ko kya nuqsaan puhancha'yaiN gee.

dosra in mandirooN key tabahi nay Hindu Fouj kay morale per buhat hi negative asar Dala, Hindu bahadur qom thee/hay, RajpootooN key shuja'at ka khud Sultan bhi qayel tha... per mandirooN, jin kay mutaliq un kay pujariyooN nay aisay aisay afsanay ghaR rakhay thay ( mera ishara kisi bhi astanay ya peer kay mazar say related afsaanooN key tarf hargiz nahi hay) kay yeh Rajpoot yehi samjhtay rahay kay Sultan inhay haath nahi laga sakay ga aur phir jab woh tabah howay tu buhat say sawalaat/confusions paida howeeN.. CONFUSED MIND maidan maiN zyada dair nahi jamta! kya khayal hay app ka?



Ehtayjaaj kerna aur jalsay jaloos kerna hamari adat ban gaya hay, jab tak ham isaay nahi choRaiN gay Masjid tu kya hamari muqadas hastiyooN key namoos bhi tabaah hotee rahay gee.

Babri masjid key shahadat per agr ham ghairat mand hotay tu yaqeenan hindustan say iss ka hisaab laytay. per chooNkay hamari ghairat sirf kamzoroN ko dabanay kay liya hay iss liya ham uss ehtayjaaj maiN bhi siwa'e apna nuqsaan kernay kay aur kuch nahi ker sakay.


=============================================



Yeh app sawalaat kay mukhtasir jawabaat thay.

Sultan Mehmood kay saath Tareekh nay buhat na.insaafi key hay. yeh eak Sultan tha ju kabhi shumaal maiN un ta'lay'azmaa'ooN kay khilaaf laRta jin kay nazdeek Sultan ka na.qabil-e-maafi jurm Ghulam, ibn-e-Ghulaam hona tha tu kabhi woh Hindustan kay but'kadooN maiN Allah kay naam per larta nazr aata...
( waisay thoRi c tehqeeq un shumali mutaharib groups per bhi ker laiN, hamaray shia bhai aisay hi Sultan Mehmood ko na.pasand nahi kertay)

App naqsha uTha ker daikh laiN. kahaaN Ghazni aur KahaaN Gawaliyaar aur Somnaat kay illaqay. kya koy laalach aisi khud.kashi key ijazat dayta hay?

salaams
the pen is mightier than the sword.
jo history hai bas wahi pata hai.
kaash ke koi valid jawabaat de jisse main bhi mustafeed ho sakoon.

p.s. aapke utthaye sawalon ke jawab aaj tak kaheen naheen parhe shayed kisi ke zehen mein aaye hi naheen including me) isliye maloomaat naheen share kar saktee though it is a requirement of your post.
aapki zaati raaye kya hai ke aisa kyun huwa,kyun hota hai aur kyun hota rahega ya is there a way out,like people becoming more generous in their thoughts and start thinking outside the box for a more broader view.

Note: Iss topic mein main jo kahon ga wo sirf aur sirf aik critic ki nazar se kahon ga kyunke jab tak aap kisi cheez ko critically na dekhein asalliyat wazeh nahin ho paati, lehaza inko meray zaati khayalaat na samjhiye ye sirf aik khaali zehan se tareekh parhne walay talib e ilm ka criticizm hai.




Wa Alaikum Salaam: Nahin ye meri post ki requirement nahin thi, wo meine sirf iss liye likha tha ke mujhe shak tha ke sawalaat dekh kar shaaid kuch jazbaati baaton ke aur mujh par laan taan kerne ke koi kuch na kahay :d





Khan bhai mera maan-na hai ke Asool sub ke liye aik hona chaahiye , kisi ki himayat sirf iss liye nahin kerni chahaiye ke wo muslim hai aur kisi ki mukhalfat sirf iss liye nahin kerni nchahaiye ke wo non muslim hai......

Agar offence is the best defence.........Aur SM Ghaznavi ne offensive jang lari thi to ye to ghalat cheez hai ke aap aik aisi qaum par hamla kar do jo aap se jang nahin chahti.

Ghazwa e Tabuk ke mauqay par poora islami lashkar tayaar ho kar gaya lekin fareeq e mukhalif jang ke liye nahin aya to usko nahin chhera gaya , wahan koi offence nahin kiya gaya.

Hazoor(PBUH) ne koi offencive jang nahin lari, Jehad offence ka naam nahin, jehad ya qattaal to zulm ke khilaaf hota hai,
zulm yani koi aap par hamla kar de jabke aap aman pasand rehna chahtay hain to apnay defence mein jahad kiya jaaye, zulm yani koi apnayawam par zulm o sitam aur qatal karna shuru kar de to uss ke khilaaf.......etc etc

Jehad is not offence against any peace living country or nation.

Aur agar Offence is the best defence to hamein America ko bura kehne ka koi haq nahin banta........America ne afghanistan mein aik offensive jang lari kyunke uskay nazdeek ye ilaqa uss ke liye khatra tha, Iraq par bhi america ka mauqaf phir sahi hai kyunke saddam hussain ke muzalim na sirf urooj par thay balkeh usne aik aur muslim mulk kuwait par hamla kiya wahan oil ko aag laga di, wo israel jo america ka ittehadi hai uss ke liye bhi khatra ho sakta tha to offense is the best defence ke tehet to ye sub jaiz qarar paatay hain???
Balkeh phir to israel ka lebanon par hamla bhi sahi qarar paata hai ke jis tarha muslims ko taaqat milnay par offensive jang larnay ka haq hai to non muslims ki dafa hum kyun cheekhtay hain ke ye zulm hai ??

Agar offensive jang kerna zulm hai to khaw koi muslim ho ya non muslim dono ke liye zulm hi hona chaahiye. isnt it ??





Baat phir wohi aa jaati hai ke asool to sub ke liye aik hona chaahiye k insaf ka to yahi takaza hai.

Baat apki bilkul sahi hai ke iss se moral down hota hai etc etc.........

Lekin kya moral down kerne ka yahi tareeka hai ke ghair islami kaam kiye jaain ?? Doosron ki ibadat gaahon ko tabah kerne ka islam mein kahin hukam nahin, haan aapki ibadat gah ko agar butt khana bana diya gaya ho to tab aapko haq haasil ho sakta hai ke uski jaga apni ibadat gah taameer ker lo.

Farz karein k aaj muslims ka moral down kerne aur unko peesnay aur unn mein inteshaar daalnay ki khatir USA and ISrael mil kar iraq mein majood islami ibadat gahon, Mizaaron aur qabron ko tabah ker detay hain to kya ye zulm nahin ho ga?? Agar zulm ho ga to jab hum yahi zulm karein to wo nafsiyati bartari kyun kehlaye ?? Zulm to zulm hai koi bhi karay.

Aapne kaha ke pujaariyun ne apnay mandiron aur butto'on ke mutallik tarha tarha ke afsanay gharay huway thay........to ye unka mazhab tha, agar hamein unkay mazhab ki kuch baatein ya tehwar pasand nahin to iska ye to hargiz matlab nahin ke usko tabah kar do ke ye hamein pasand nahin........Kya mazhabi rawadari issi ka naam hai ?? Agar USA army ko Quran nahin pasand ata to kya unka Quran ko talf kerna ya uski bay-hurmati kerna zulm nahin ho ga?? Hum jo apnay liye pasand nahin kertay wo doosray ke liye kyun kartay hain??

Aur afsano ka kya hai kya pakistan ya hindustan ke mizaaron waghera ke mutallik afsanay nahin majood?? data darbaar, ajmeer shareef aur doosray buzurgon ke mizaaron ke mutallik hindoun se bhi bharh kar afsanay majood hain...



Hazrat Ibrahim(AS) ne koi ibadat gah tabah nahin ki thi sirf aik moorti ko tora tha ye samajhnay aur samjhanay ke liye ke ye to apni hifazat hi nahin ker sakti...........Hazrat Omar(RA) ke daur mein muslim faujein jahan jahan gayi kisi aik mandir, church ko nahin chhera, Haan agar wahan ke church walay khud musalmaan ho gaye to unhon ne khud church khatam kar diya ho to ye aur baat hai......
Hazoor(PBUH) aur hazrat Ali(RA) ne kaaba ke butt toray, wo kis liye, kaha jaa skata hai ke wo mushrikeen ka ibadat khana tha to usko kyun nuqsan pouhanchaya, to uska jawab yahi hai ke wo butt khana uss ibadat khanay ki jaga par taameer kiya gaya tha jo Hazrat Ibrahim(AS) ne Aik Allah ki wahdaniyat ko witness bana kar qaim kiya tha ke yahan uski nibadat ki jaaye, baad mein usko mushrikeen ne butt khana bana dala , issi liye wo wapis liya gaya warna kahan islami faujein gayi aur church toray?? Agar khilafat e rashida mein aisa kahin hua to hum usko tareekh ki ghalat bayani to keh sakain gay lekin uskay baad agar hua to usko hum do tarha se dekh saktay ahin ke ya to tareekh mein kharabi hai ya wo muslims ki zyadtiyan thi.




Kyun hisaab letay?? Agar ye zulm tha to jab muslims unki ibadat gaahon ke sath karein to wo kyun zulm nahin?? uss aik baabri masjid ke jawab mein pakistan ke "ghairat mand" muslims ne kayi mandir pakistan mein jala daalay, kya islam yahi sikhata hai?? uss par kisi ne ehtajaaj nahin kiya ke aik taraf aik masjid giri aur doosri taraf kayi mandir. lekin zulm phir bhi masjid giranay walon ne kiya??? akhir kyun?? hamaray asoolon ke alag alag paimanay kyun hain??
Ab pope ne bayaan diya jawab mein palestine mein muslims ne 4 church jala daalay.......kya phir bhi islam ko ya musalmaano ko tashaddud pasand na kaha jaaye?? Aik masjid girti hai to appeals shuru ho jati hain ke maafi maango aur kayi church jaltay hain kayi madir girtay hain to tub kyun nahin maafiyaan maangi jati?? tab kyun nahin hum ehtajaj kartay ke mazhabi rawadari ke khilaaf kaam kiya gaya hai?



Abhi ye teh karna baqi hai ke uska maqsad Allah ka naam tha ya daulat aur zameen par qabza.......Kya Allah ne iss baat ka hukam de rakha hai ke jab tum taqatwar ho jao to kamzoar qaumon par hamla kar do aur unki ibadat gahon ko tabah kar ke unkay mandiron se sona looto aur unkay mulk par qaabiz ho jaao???




Aap bhi naksha utha kar dekhiye, kahan USA aur kahan Afghanistan..........kya laalach USA ko apni pur aasaish zindagi chhor ke tora bora ki mountains mein khudkushi kerne ki ijazat deta hai ???

Hum USA ko aik minute bhi afghanistan aur iraq mein rakhne par raazi nahin aur issay zulm samajhtay hain lekin jub musalmaano ne hindustan par qabza kiya to kayi kayi sau saal yahan hakumat kartay rahay, kya ussi asool ke tehet usa wahan hakumat karay to wo sirf iss liye zalim ke wo muslim nahin???

Mughal baadshahon mein se kon aisa tha jo Allah ke naam par hakumat karta raha?? sub qaabiz nahin thay kya?? jinki zindagiyun kya hakumaton mein bhi islam majood nahin tha, jinhon ne apnay daad e aish ke liye kaneezon kay bairay muhayya kar rakhay thay......isnt it??

App yahaaN per kehna chah rahay haiN kay Hindu Peace-Loving qoum thee, bus Sultan Mehmood hi un per chaR DoRa

bhai meray ju hisa app nay quote kya hay uss say uper wala hisa bhi dekh laytay.. yeh jangaiN sultan kay Walid kay zamanay say Shoroo howeeN. Agr Sultan tu eak din Sultan ko ek.la'tadaad lashker ka samna kerna paRta aur woh bhi Ghazni key hadood maiN.

App (SAAW) nay kabhi offense nahi kiya, tu Fatah Makkah kay baray maiN app key kya raye hay. Quresh nay sirf eak Mahida hi toRa tha, na koy jangi tayariyaaN theeN aur nahi un key aisi koy niyaat.
Jab kay Hind maiN Maharajay her shikast kay baad pehlay say zyada tayaari kay saath samnay aatay.

Aur America ko bura kon kehta hay. Infact agr history likhi jaye gee tu American Mo'arakh Bush ko Kamyaab tareen sadr qaraar daiN gay.. ahaiN, kosnay ( jaisay kay ham day rahay haiN) sirf kamzoor qomaiN hi dayteeN haiN...

Israel kay ander iss jang kay silsilay maiN koy do raye nahi thee... western mumalik bhi Israel kay hi saath thay...

hamara Almiya yehi raha hay, Infact Haider Ali aur Sultan Tipu bhi issi ka shikaar rahay ( jis key qeemat hamay ada kerni paRi) kay ham log uss waqt dushman say foran sulaah kay liya tayaar ho jatay assuming kay woh Peace Loving hay...

maiN ay Offensive laRa'i ko jurm qaraar hi nahi diya. so i ll not defend it.



Farz kya kerna hay, woh log aisa ker rahay haiN abhi pichlay dinooN hi Shia aur Sunni hazraat kay mazrooN aur qabrooN maiN dhamakay aur problems howeeN theeN.. per ghairat phir kisi ko nahi aatee.. aisi qom ko apni ibadat gah per sirf rona hi chahiyee ju uss kay hifazat kernay key ahl na ho.

maiN nay kabhi bhi issay zulm nahi samjha. mazloomiyat key dastanaiN etc.. say mujhay hamesha hi chiR rahee hay. phir kahooN ga galiyaaN aur kosnay wohi log diya kertay haiN ju kamzoor hooN.





tu ghalat haiN.





App key itla'a kay liya arz hay kay siwa'e somnaat kay koy bhi mandir tabaah nahi kiya gaya. tamam mandir qayam rahay sirf but tabah kiya gay.

Somnaat kay mandir key tabahi key wajaah yehi thee kay yeh mandir kam aur qila zyada tha.. aadhay say zyadan mandir tu jang kay doraan hi tabaah ho gaya tha... koy Fataah Dushman kay na.qabil-e-taskheer qilay ko nahi choRta. issi liya iss qilay.numa mandir ko bhi tabah ker diya gaya.



bhai app asal baat ko miss ker rahay haiN.

Ju qomaiN ghairmand hoteeN haiN un kay ibadat.gahaiN tu door key baat aam aadmi ko bhi kuch kehna mumin nahi hota. ham log qomi ghairat.o.hamiyat kay hamil hotay tu issi koy ailan jang samjhtay..

Ghaliban Yazeed kay dor maiN Jihad-e-Qustantuniya howa, Hazrat Abu Ayoub Ansaari (RZA) issi doran wafaat paa gay, App (RZA) nay waseeiyat key kay mujhay shehar kay jis qadr kareeb dafana sakoo dafna doo.. MuslmanooN nay unhaiN Faseel kay saath dafn ker diya aur Qaisar ko paigham bhaij diya kay agr iss qabr ko kuch howa tu Islami duniya maiN koy church salamat na rahay ga... yeh Islami dabdaba hi tha kay woh Qabr aaj bhi salamat hay.

yehi kuliya yahaan per sadiq aata hay... agr Hinudstan ko yaqeen hota kay Pakistan uss say iss masjid kay bay.hurmati kay badla lay ga tu woh aisi jurat kabhi na kerta... per usay pata tha kay PEACE LOVING nation hay zyada zyada putlay hi jala laiN gay.. jalanay doo..




maiN tu USA ko criticise nahi kerta.. woh log ju apnay liya behter samajhtay haiN ker rahay haiN.. agr ham maiN himat hoti tu un ko mouN toR jawab day saktay thay.. per ham un kay 2/3 fouji maar ker hi khush ho laytay haiN.

USA ko choRaiN woh tu buat baad maiN aya.. 1947 say India Kashmir maiN baiTha hay, siwaye baRkay marnay kay ham nay kya ker liya hay???

=======================


Peace Loving Nations

MughlooN kay zawal kay aakhri dinooN maiN jab br.saghir ko umra nay apnay tor per banTliya tha... uss waqt Peace Loving kay amli muzahiray daikhnay maiN aye.

Agr Bangal per MaRhaTa ya AngraizooN nay yalghaar key tu Odh kay nawaab aman ka parchar kertay rahay aur amalan bangal ko ghulami say bachanay kay liya koy qdam na uThaya... same happend with Sultan Tipu.

aur Angraiz eak eak ker kay sab ko nigal gaya.. ham per jihad arsa howa farz ho chuka hay...

Quran maiN hukm mojood hay kay "aay iman walooN tumhay kya hogaya hay kay tum un kay khilaaf nahi laRtay ju aurtooN aur bachoon aur kamzoorooN per zulm kertay haiN" ( Mafhoom) ( for ref. let me check the sura again)

issi aya maiN jihad ka hukm hay.. app yeh zyada behter tor per jantay hooNgay...


Note:

App jis per chahay Criticize karaiN, per kernay say pehlay saray pehlo'ooN ka jaiza laiN. other wise app Bias honay ka ilzaam bhi lag sakta hay aur mostly Critics issi liya apni credibility kho daytay haiN kay woh eak side key hi baat kiya jatay haiN.

Babri Masjid per ehtayjaaj ka waqaya bhi sun laiN


yeh tu app ko maloom hi hoga kay JTI kay kayee wings illaqooN maiN bhi active hotay haiN aur College maiN jamiyat kay auhday'dar inhay run kertay haiN...amooman in ka ijlaas Esha key namaaz kay baad howa kerta tha...

Jin dinooN babri masjid shaheed howi tu, hamaray College aur illaqay maiN bhi Jamiyat nay yehi kaam shoroo ker diya ( yani ehtayjaaji muzahirooN kay liya logooN ko jama kerna )

mujhay aur meray dostooN ko bhi dawat dee gayee:
Mukalmaati Surat maiN paish karooN ga

JTI: App log kal kay ehtayjaaj say bhi ghayab thay, aur maiN nay app ko Shalmar bagh maiN dekha tha

Ham: muhtaram app wahaaN kya ker rahay thay?

JTI: bataiN mat bana'oo, kal ka jalsa ahem hay, kaye BaRay baRay leader ayaiN gay, ham India ko kal bata daiN gay kay ham abhi zinda haiN

Ham: tu kal ka jalsa wahga border per hoga na, JahaaN say ham log India per yalghaar ker daiN gay. islayha kon day ga

JTI: nahi ham log sirf Nasir Bagh maiN jalsa karaiN gay?

Ham: tu uss say kya hoga?

JTI: ham India per sabit karaiN gay kay ham uss kay iss iqdaam per ehtayjaaj kertay haiN

Ham: tu phir. India kya karay ga.. jaldi say masjid bana day ga

JTI: (dhamki amaiz lehjay maiN) saaf saaf bata'o chalo gay kay nahi

Ham: wahaaN per khanay ko kya milay ga?

JTI: kuch bhi nahi?

Ham: phir na tu ham ayaiN gay aur nahi, kisi aur ko janay daiN gay.. MSF walay aalloo aur qeemay walay naan khila'yaiN gay.. ham wahaaN per hi jayaiN gay

Abhi meine sirf sarsari nazar se aapkay akhri replies parhay hain, inn ko save ker liya hai inko parh kar aur soch kar inn par raat ko post karon ga, filhaal aik do points clear ker don.





Dekhein baat ye nahin hai ke aap kya samjhtay hain......Iss waqt daylight aur khan amer mein baat nahin ho rahi , aap ye samajh lein ke 2 ajnabi shakhs aik taareekhi waqaya ke mutallik apnay khudshaat bayaan aur door ker rahay hain......
Dont take it like k daylight mehmood ghaznavi, muhammad bin qasim etc ke baaray mein aisay khayalaat rakhat hai etc etc, just take it as a student of history.



Criticize karne ke liye bias hona parta hai warna baat sahi tarha se clear nahin ho paati.......Hamaray yahan HC mein aik member thay "Mulla" unhon ne aik baar bilkul sahi kaha ke jab bhi mazhab par tanqeed karo to secular bun kar karo aapko ziada sahi response milay ga aur baat ki ziada samajh aaye gi.
Maslan ab kisi ko islam par tanqeed kerni hai aur jawabaat haasil kerne hain unn baaton ke jinko wo qaabil e aitraz samajhta hai to ussay mukammal bias aur secular ho kar tanqeed kerni chahaiye , iss se ye ho ga ke uskay dil mein koi phaans nahin reh jaaye gi aur agar usko uskay sawalaat ke tasalli bakhsh jawab mil jaain gay to ye uss se kahin behtar hai ke banda bias ke label se darr ke poori tanqeed na kar sakay, iss se aadhi baat dil mein reh jati hai.

Ab main agar tanqeed kertay waqt sochon ke koi kya kahay ga ke ye muslim heroes par tanqeed kar raha hai to yakeen karain ke na to parhnay walon ke dil mutmain hon gay na aik aam history ke student ke.

Jo aitraazaat meine pesh kiye ye wo aitrazaat hain jo mehmood ghaznavi par hotay chalay aaye hain , lehaza inko bay-jhijak pesh kerne se ho ga ye ke sochon ke darwazay khulain gay aur hum inn aitrazaat ke jawabaat talash kar sakain gay.........So isko bhool jaain ke tanqeed kerne wala koi daylight hai ya koi koi muslim hai ya koi pakistani hai.......Aap ye samajh kar iss tanqeed ko qabool kijiye ke hindustan ka aik hindu aap se ye sawal kar raha hai.

Paito !!! phir khaye thay naan ??



Nahin main ye nahin kehna chahta lekin agar uss waqt hinduon ki taraf se pehla na hui thi aur koi aur wajah bhi na thi hamla kerne ki to jung shuru kerna insaf nahin tha.....thats why i asked ke usne kyun hamla kiya.

If that was an "offence is the best defence" thing , i should call it un islamic act.



Yani hamein pehle ye dekhna ho ga ke uskay baap ne kyun shuru ki thi, wajoohaat kya thi, can u share ?? kya wo bhi offensive thi?



Yakeen kijiye ke Jehad offense ka naam hi nahin hai Hazoor(PBUH) ne wakayi koi offensive jang nahin ki.

Fatah Makka :

Sulah Hudaibiya hua jis mein ye tha ke jangi madad nahin ki jaaye gi aik dosoray ke saathi qabeelon ke khilaaf.
Lekin muslmaano ke sathi qabeelay Banu Khaza par Mushrikeen e makkah ke sathi qabeelay Banu Bakar ne hamla kar diya, ab sulah hudaibiya ke mutabik makkah walon ko banu baqar ka sath nahi dena chahiye tha lekin unhon ne muahida toar ke banu baqr ka sath diya aur banu khazah ke logon ko ain haram e pak mein qatal kiya , Khazah ke kuch loag Hazoor(PBUH) ke paas aaye unhon ne madad ki darkhast ki, koi aur hota to fauran jang ker deta aur jang banti bhi thi, lekin wo to Hazoor(PBUH) thay unhon ne phir jang na ki balkeh sulah nama barqarar rakhne ki akhri koshish kar ke 3 shartein pesh ki makkah walon ko

1- Khoon baha diya jaaye
2- Quresh banu bakr ki himayat se dast bardaar ho jaain
3- Eelan kar diya jaaye ke sulah hudaibiya toot gaya.

Quresh ne teesri shart maan kar sulah nama toar diya aur banu baqr ka sath diya jiskay jawab mein Hazoor(PBUH) ne bhi iss jang mein banu khazah ka sath diya aur banu baqr aur quresh dono ko shikast hui aur issi ke nateejay mein Makkah fatah hua.......

Now tell me kya ye offensive jang kahi jaa sakti hai kisi bhi tarha??



Dekhein ji jab kisi pe jang musallat ki jaaye to wo zyada tayari se hi aaye ga har baar.



Wohi kaha na ke phir muslims ko koi haq nahin ke wo iss ko zulm kahain kyunke wo khud aisa kertay rahay hain doosron ki ibadat gahon ke sath.......Ya aik soorat ye hai ke hum dono dafa ke iqdamaat ko zulm qarar dein, jo muslims ne kiya wo bhi aur jo iraq mein hua wo bhi....aur doosri surat hi behtar hai.




OK ji dont defend it, lekin Hazoor(PBUH) ne koi offensive jang nahin lari , aakhir kya wajah ho sakti hai?? kahin ye to nahin ke islam ne offense ka hukam nahin diya??




Khan bhai wo koi qila na tha , jesay baqi mandir tabah kar diye gaye to unhon ne apnay sub se muqaddas mandir i hifazat to kerni hi thi, jesay yahoodiyun ki jaga bait ul maqdas par hindu hamla kartay jinko bait ul maqdas se koi dilchaspi nahin thi to muslims ka awwalein farz hota ke wo uski sub se ziada hifazat karein......ye aisi hi cheez thi ke wo apni mazhabi ibadat gah ki hifazat kar rahay thay.........aur yakeenan kisi ke mazhabi jazbaat ko iss tareekay se thais pouhanchana sahi to nahin.



Ye sirf aik dhamki ya nafsiyati hamla tha un par ke wo isko chhairain na........aur aisa harba yakeenan kaamyab rehta hai warna agar wo usko tabah ker bhi detay to muslims jawab mein unki ibadat gaahein na tabah kartay aur kertay to khilaaf e islam cheez hoti.



Bilkul Jehad ka hukam hai , aapne jo ayat quote ki wo Surah An Nisa ki ayat 75 hai........lekin jehad se kis ne inkaar kiya?? Mazloom aurton aur bachon pe zulm ho to kisne kaha ke tub bhi talwar na uthao??

Lekin yahan phir dekhiye ke Quran ne again Offensive jang ka hukam nahin diya......Quran mein beshumaar ayaat hain jehad o Qattaal ki sub ki sub dekh lein kahin bhi offensive jang ka hukam nahin, jehad ka jahan hukam diya hai wo ya to apnay defense mein ya phir mazloom ki madad ke liye......ye kahin nahin aapko milay ga ke muslims bagher inn do wajoohaat ke kisi par charh dauray "offence is the best defence" ke naam apr.......Quran dekhiye aur Hazoor(PBUH) ki saari zindagi dekh lijiye.......kahin aapko ye tareeka nahin milay ga jo bud-qismati se baad ke muslim hukmarano ne shuru kiya.......

Aisay waisay!!! muft kay naan hooN tu bhook aur bhi chamak jatee hay...



Jaisay kay maiN nay pehlay kaha...

Jang Sultan Mehmood nay shoroo nahi khatam key thee...

Jang Sultan kay walid kay zamanay say shoroo howi thee... Ab yahaaN per aa ker tareekh maiN shadeed kisam ka conflict hay... kuch ka kehna hay kay Sultan Subak'tageen nay Raja Jay.Pal key sultanate per pehlay hamala kya tha jab kay kuch ka kehna hay kay Raja Jay.Pal, Mojooda Khaibar key hadood( iss silsilay maiN lamghaan kay illaqay ka zikr hota hay) say bhi agay nikal aya jis per Sultan Subaktageen kay fouj agay ayee...Mosam key wajaah say Raja Jay.Pal ko shikast howi aur uss nay sulaah ka mahida kiya jisay uss nay phir toR diya...

Hawala koy sa bhi ho, saray mo'arakh iss baat per mutafiq haiN kay Pehli Jang Mojooda Afghanistan key hadood maiN hi laRi gayee thee...aur yeh illaqa Raja Jay.Pal key sultanate say bahir tha.. yani Offence Raja key tarf say tha...

iss baad dosri jang bhi Sultan Subaktageen kay hi door maiN Mojooda Peshawar kay gird.o.nawah maiN hi laRi gayee thee. jis maiN Raja Jay.Pal ko shikast howee aur raja nay baj ada kernay aur jang na laRnay ka mahida kiya aur phir ToR diya


ab yeh baat tu mubhim hay kay pehli jng kis nay shoroo key per yeh yaqeeni kay dosri Raja Jay.pal nay shoroo key...

issi asna maiN Sultan Subakta'geen wafaat paa gay aur Sultanate Ghazni maiN janeeshini kay jang chiR gayee... jis maiN Sultan Mehmood nay apnay bhai ko shikast dee aur aur Ghazni kay takht per baiTh gaya.

Waqaya nigaar likhtay haiN kay yeh takht Sultan Mehmood kay liya kanTooN key saij sabit howa.

yahaaN per yeh batana bhi bay.mehal na hoga kay woh dor muslim.uma key apasi khana.jangi ka dor tha... kaheeN Samani iqtaydaar maiN thay tu kaheeN Elak.Khani, kaheeN mamlook aur kaheeN turk. abbasi hakomat ka kaam bus in maiN say kamyaab honay walooN ko sultan key sanad ata kerna hi tha.

In short shadeed khana jangi kay iss dor maiN Sultan nay Iqtaydaar key masand per qadam rakha aur ju pehli khabr ussay mili woh yeh kay RajaJay Pal nay Baj ada kernay say inkaar ker diya hay aur Lahore maiN jangi tayaariyaaN arooj per haiN, Raja Jaypaal ko HIndustan kay degr rajooN kay fouji aur mali madad bhi hasil hay.

Aisay maiN koy bhi Sultan ju sehal pasand na hoo..( like Mughal bashah's Delhi Do'rust) woh apnay gher maiN nahi baiTh sakta.. sultan nay bhi yehi kiya.. uss nay Raja ko jangi tayariyaaN mukamal kernay key muhalat nahi dee aur chaRha'i ker dee... Now this is the same Strategy used by Hazrat Khaled bin Waleed (RZA) dushman ka intayzaar mat karo.. ussay bay;khabri maiN pakaR loo... ussay mukamal tayari key muhlat mat doo.. jis nay bhi aisay kiya uss nay ultimately shikast hi khay'ee Sadam Hussain hall key misaal hay... Sultan Tipu maazi key misaal hay.

behr.kaif Sultan nay iss lashker ko shikast dee aur Raja Jay.Pal qaid ho gaya aur baad maiN Baj ada kernay aur aa'inda laRa'i na kernay key shart per azaadi hasil key.. per Lahore aatay hi uss nay khud.sozi ker lee aur uss ka pota ya beta Bheem takh.nasheen howa jis nay again Sulaah nama toR diya aur nay'ee jang key tayariyaN kernay laga... iss nayee jang maiN ussay Multan kay Qaramti Hukumran key madad bhi hasil thee. yahaaN per phir wohi howa, Sultan nay Raja Bheem ko bay'khabri maiN ja pakRa aur Raja Bheem ko shikast howi aur woh Kashmir chala gaya. agli Jang Kashmir maiN howi jis maiN sultan ko shikast howi aur woh uss key taqreeban sari nafri kaam aa'gayee...

Kashmir key jang Raja'ooN ka hosla re-build ker diya... unhooN nay eak buhat baRa lashker tayaar kerna shoroo kya jis key manzil ghazni tha.. Sultan nay as usual iss dafa bhi maidan-e-jang Hindustan key sarzameen ko hi banaya. aur iss lashker ko shikast howi...


yahaaN per yeh bhi batata chalooN kay sultan nay her baar paish.qadmi in raja'ooN key jangi tayariooN key itlaa per hi key... inn jangooN ka khatma bil.aakhir Somnaat key tabahi per howa...

Agr Sultan Tipu bhi Sultan Mehmood kay naqsh.o.qadam per chaltay tu shayad aaj bar.e.saghir key tareekh mukhtalif hotee... issi taraah agr Sultan Mehmood bhi Sultan Tipu key ra'wish ikhtayaar kertay tu shayad saray Asia key tareekh hi mukhtalif hootee.






Banu Bakr aur Banu Khazaah key laRa'i say pehlay mahida nahi tooTa tha, Mahida LaRa'i key wajaah say hi tooTa tha.

Ab yahaaN per App(SAAW) kay jangi baserat mulahiza hoo, jaisay kay maiN nay pehay kaha kay Makkah walay jangi tayaariyaaN nahi ker rahay thay, per iss baat key koy zamaanat nahi thee kay woh aa'inda aisa nahi karaiN gay yani mustaqbil maiN woh log dobara say Madina ya MuslmanooN ko nuqsaan puhanchanay say baad rahaiN gay.. so App(SAAW) nay iss khatray ko hamesha kay liya khatam kernay kay liya Quresh ko tayaari key moqa diya baghair hi ja pakRa. aur Quresh aur taif kay maghloob hotay hi saray Arab nay hathyaar Daal diya.

yehi wahaaN per howa.. Somnaat key shikasat kay baad koy Hinda Raja arsay tak Challenger nahi ban saka.


baqi kay reply aaj hi dooN ga per shaam tak

go maiN koy Jangi Tajziya Nigaar nahi hooN per, Insaani tareekh key jangaiN aur un before and after math meri dilchaspi ka markaz raha hay.

yeh meri observation hay kay jang wohi hoti hay jis maiN eak fareeq key taqat mukamal tor per tabaah ho jaye aur woh sir uThanay kay qabil na rahay.. fatah Makaah aisi pehli jang thee... Jabkay Badr ka Ma'arka iss kay tarf pehla qadam

Yarmook key jang nay RomiyooN kay Asia maiN kamr toR dee... jab kay Mota aur Tabuk kay ma'arkay iss key tarf pehla qadam.

Qadsiya key jang kay baad Irani kaheeN sir uThanay kay kabil na rahay.


iss say bhi peechay chalay jayaiN... Greeks nay IraniyooN ko Mojooda Tabraiz kay gird.o.nawaah maiN aisi faisla.kun shikaast dee kay uss kay baad koy Irani tajdaar Europe key razm.gahooN maiN na ja saka.

Sultan Mehmood key jangaiN bhi issi tanazur maiN theeN.. agr ussay itmaynaan hota kay Raja mazeed tayaari nahi karaiN gay tu wah mazeed hamlay na kerta.. uss aakhri hamla bhi un JaaTooN kay khilaaf tha ju Sindh kay illaqay maiN Jangi Qowat bantay jaa rahay thay.... Somnaat kay baad kisi Rajay nay na tu jangi tayaari key aur nahi aisi koy jang hamay nazr aatii hay...



kamzoor logooN aur qomooN key eak nishani hotee hay, yeh nishani kisi bhi zawal pazeer ma'shray maiN daikhee ja saktee hay.. yeh log her afaat ko maiN afiyat kay pehloo talaash kertay haiN.. her action ka asaan reaction talaashtay haiN.
Hajaaj bin Yousaf ko jab itlaa mili kay hindu'ooN nay muslim qaflay looT liya haiN tu uss nay sirf eak Sifarat bhaiji jis maiN saaf kaha kay hamara aadmi hamay wapis kerdoo, LooT ka maal bhi wapis ker doo, aur Dako bhi hamaray hawalay ker doo...

Raja nay inkaar kiya aur apni Sultanate say haath dhoo baiTha...

Changaiz Khan kay Safeer Khawarzam Shah kay darbaar maiN gay tu Khawarzam Shah nay unhaiN qatal kerwa diya.. jawab maiN Changaiz Khan nay Khawazam key sultanate hi khatam ker dee...


aur Rajay kay panDit yeh kehtay rahay kay hamara bhagwan inhay neest .o.naboot ker day ga

Muslim Situation maiN So called Ulema aur Molana MuslmanooN ko yaqeen dilatay rahay kay in tatriyooN per azaab-e-Ilaahi aye ga...

kehnay ka maqsad phir howi hay.... Zulm key Defination bayaan kerna buhat mushkil hay.. ho sakta hay kay eak qom ka Zulm dosri qom kay liya akseer ho...jaisay jab Muslmaan Hind maiN aye aur Sultaan key wajaah say yahaaN per logoN ko Azadana mazhaab qabool kernay ka moqa mila tu sadiyooN say dabay howay harijan aur pasmanda tabqay ko Sultan apna Nijat-e-d'hinada nazr aya... yeh Sultan kay saath aye ISlam ka hi kamaal tha kay in logooN ko bhi insaan samjha janay laga..

Moa'rikhooN kay mutabiq Sultan Mehmood ko Somna'aat kay mandir ka ilm nahi tha, yeh mandir uss waqt Sultan key nazrooN maiN aya jab Sultan nay Gawaliyaar ( i 'll confirm this kay kamaan Gawaliyaar kay Raja kay pass thee) kay Raja key zar-e-kaman Hindustan tareekh kay sab say baRay lashker ko shikast dee. Moa'rikhooN nay uss Lashker key tadaad 3 lakh say zyada batayee hay. dee tu puray hindustan maiN yeh nara aam hogaya kay Sultan ko agr kaheeN shikast ho saktee hay tu woh Somnaat kay maidaan maiN. Raza'karooN aur mukhtalif RajooN key afwaaj Somnaat maiN jama honay lageeN.. aur again jangi tayaariyaaN arooj pakaRnay lageeN...

Iss kay saath Hindu'ooN nay Sultan key fouj ju kay Punjab aur wastee Hind maiN ta'inaat thee kay saath chaiR ChaaR dobara shoroo ker dee...

Jaisay kay pehlay kaha kay Sultan ka wasf tha kay jab koy uss ka koy dushman jang key tayaari kerta tu Sultan ussay tayaari ka moqa nahi dayta balkay bay'khabri maiN pakaR layta...
Sultan ko Somnaat maiN hindu Afwaaj kay jama honay kay itla'aat mileeN tu Sultan nay Ghazni say kooch kya...

yaad hay iss post maiN meiN nay app ko kaha tha kay naqsha daikhaiN... yeh issi liya tha kay baat wazah ho sakay.. Ghazni say Somnaat ( mojooda Indian Gujrat ka sahil) kay darmayaaN 5 Darya, aur 1,000 mile lamba sehra hay....

Aaj kay iss dor maiN bhi jab USA nay Iraq per hamla kya tu Sadaam key foujooN nay Nasriya, Kerbala aur Uml.Qasr kay muqaam per USA Army ko sehra maiN ghomma ker rakh diya... USA army ko iss qadr mushkil'laat ka samna kerna paRa kay unhooN nay 3 din kay liya yak.tarf jang.bandi ker dee aur apnay saray plans ko re-structure kya...

Now imagine aaj say 1000 saal pehlay itna lamba sehra croos kernay ka matlab.. yani rasd.o.kamak ka koy zaria nahi.... pespa'i key surat maiN mukamal tabahi.... aur agr Hindu thoRi aqal say kaam laytay tu Sultan issi sehra maiN hamesha kay lya gum ho jata.

Qisa mukhtasir, Sultan kay Somnaat janay key wajaah maloom kerni chahiyee! kay Sultan nay yeh Khud.kashi ka tariqa kyoN ikhtayaar kya???

yahaaN per yeh Point note karaiN kay woh iss dhamki maiN aye hi kyoN? iss key wajah yeh hay kay woh jantay thay kay bayshak muslmaan yeh sab kernay kay taqat aur qudrat rakhtay haiN..

Sultan kay dor maiN muslmaanooN key halat kuch itni achi nahi thee... ( bas bai'rooni hamla aa'our nahi thay) Sultan nay in butooN ko toR ker un per eak taraah yeh baat wazah key thee kay, tumharay khuda bhi mera agay bay.bas haiN...




YahaaN per eak misaal dooN ga

Agr Pakistan ko yeh itlaa mil jaye kay India Pakistan per hamlay ka faisla ker chuka hay aur uss key jangi tayaariyaaN puray arooj per haiN...Infact India Pakistan ko ultimatam bhi day chuka hay tu konsa kaam sab say behter hoga

1) Pakistan baiTh ker intayzaar karay kay kab India Hamla karay aur woh Jawab day.
2) Pakistan agay baRh ker India per hamla ker day, ta'kay woh apni tayaari puri na ker sakay

DL Brother

aap k khayaalaat chauraha walay columnist Hassan Nissar say ketnay miltay jultay haiN. kaheeN aap onkay relative /shagird to naheeN woh bhi tareekh k har oss angle ko highlight kartay haiN jissay islam, islamic aqaid aur aalamay islam ki tazheek o tahqeer ka pahloo obharta ho.... aap hassan nissar k 100 column oTha kar paRh laiN 90% columns maiN pesh kardah "haqaiq" ka conclusion yehi nikalta hai. Allah aap dounouN par raham karay.

Thanx for appreciation rather depreciation haha

Agar tareekh ka tanqeedi lehaz se jaiza lena jurm hai to yakeenan main mujrim hon, Agar ye tareekh bayaan karna ke Aurangzeb bouhat hi soofi mansh insan tha, topiyan see kar guzara karta tha, jaza hai aur ye kehna ke wo apnay bhaiyun ka hi nahin apnay baap ka bhi qatil tha aur usne kaneezon ki aik fauj apnay mehal mein rakhi thi, saza hai, to main wakayi saza ka mustahiq hon......Agar ye tareekh bayaan karna ke Abbasiyun ka daur islam ka darakhshanda daur tha, jaza hai, aur ye kehna ke unhon ne apnay mehal laundiyun se bharay huway thay aur larkiyun ki khareedo farokht ke bazaar qaim kiye huway thay to saza hai aur Aalim e islam ki tazheek hai to main wakayi iska murtaqib hon........Agar Haroon ur Rasheed aur Mamoon ur Rasheed ki paarsayi ki tareekh bayan karna islam ki azmat ki nishani hai aur hazaron masoom musalmaano ka unkay hukm se "khalq e quran" ke maslay par qatal kiya jana islam ki tazheek hai to yakeenan maine aisa hi kia hai.........Agar mughlon ki hakumat ko islam ki azmat samjhana chaahiye aur main unkay juraim ginwanay lagon to wakayi ye tazheek ho gi Aalam e islam ki kyunke hum loag tasveer ka aik rukh dekhne ke aadi ho chukay hain........


Main agar kahon ke musalmaano ne hinduon ka mandir gira ke uss jaga babri masjid tameer ki to main mujrim............lekin agar Maudodi sahib ye dawa karain ke musalmaano ne Palestine mein yahoodiyun ki ibadat gah gira kar apni masjid e aqsa tameer ki to wo mujrim nahin (agarche maudodi sahib ne ghalat tareekh bayan ki hai aur masjid e aqsa yahoodiyun ki ibadat gah apr tameer nai hui)

Agar Doctor Hameedullah sahib ye tareekh bayaan karain ke Espain par qabza karne ke baad muslamaano ne dkeha ke saath ke kuch eelaaqon par jo eesayi hakumatein hain wo kamzoar hain to unhon ne raat o raat un par hamla kar ke qabza kar liya to MashAllah se ye islam ki azmat ka bayaan hai...........

Aur janab e muhtaram , Taarekh tabri, Taareekhi kitab Badaya Wa Nahaya by Ibne Kathir ki sirf Hazoor(PBUH) ke mutallik kuch "tareekhi" qissay bayaan karon to yakeen kijiye aapkay kaan aur aankhein sunnn ho ke reh jaain aur apkay pairon talay se zameen nikal jae........lekin wo to islam ki azmat bayaan kertay hain chahay iss ke liye wo Namoos e Risalat (PBUH) pe hi kyun na hath daal dein, Sirf hazrat Maria Qibtiya (RA) ke mutallik hi apnay tareekh daano ke kartab mulahiza kar lijiye aapko maloom ho ga ke asal mujrim kon hai aur islam ki tazheek kon karta hai.......


Maine iss topic mein bhi Khan bhai ko bataya tha ke main jo kuch pooch raha hon wo mere apnay khayalaat nahin balkeh iss islami tareekh par jo aitrazaat kiye jatay hain wo meine sawal ki shakl mein pesh kiye hain, aur meine iss silsilay mein bilkul aik naaqid bun kar khan amer se thori si discussion ki, Mere khayaal mein chunke itni discussion kafi thi aur iss se mujhe kafi points mil gaye lehaza i stopped it lekin mujhe khan amer ko thanx bolna chahaiye tha ke unhon ne intehayi tahammul se jawab diye aur aik faida mund discussion hui, kyunke aam taur par aisi discussion ki nahi jaati kyunke fareeq e mukhalif pehli baat hi wo kerta hai jo aapne ki aur discussion wahin khatam ho jati hai

Thanx khan jee , meine aapka reply ussi din parh liya tha and i thought its enough, hamain sochne ke liye kafi material mil gaya i hope ke aap samajh gaye hon gay k why i didnt reply